23 Tamyz, 09:00 278 0 Sport Túrkistan Gazeti

Eýropa lıgasy: «Astana» BATE komandasyn oısyrata jeńdi

Fýtboldan UEFA Eýropa pleı-off satysyndaǵy alǵashqy kezdesýinde elordalyq «Astana» óz alańynda Belarýstiń BATE komandasynan basym tústi, dep habarlaıdy QazAqparat tilshisi.

Pleı-off kezeńinde joly bolǵan komanda jarystyń toptyq satysyna joldama alady. Sondyqtan eki komanda da búgingi kezdesýde ózderine qolaıly esepke qol jetkizýge barynsha kúsh saldy.

«Astana» sapynda alǵashqy mınýttan Nenad Erıch, Antonıo Rýkavına, Lýka Shımýnovıch, Evgenıı Postnıkov, Dmıtrıı Shomko, Iýrıı Logvınenko, Ivan Maevskıı, Rýnar Mar Sıgýronsson , Dorın Rotarıý, Fırmın Mýbele, Marın Tomasov shyqty.

Al BATE bapkerleri Anton Chıchkan, Aleksandar Fılıpovıch, Slobodan Sımovıch, Zahar Volkov, Alekseı Rıos, Evgenıı Iablonskıı, Stanıslav Dragýn, Dmıtrıı Baga,  Igor Stasevıch, Erven Mýkam jáne Maksım Skavysh syndy jigitterge senim artty.

Oıynnyń alǵashqy mınýtynan bizdiń komanda tizgindi qolǵa alyǵa tyrysty. Qarsylastar qaqpasy mańynda qaýipti shabýyldar uıymdastyrdy. Nátıjesinde alǵashqy bolyp esep ashty. Kezdesýdiń 23-mınýtynda Marın Tomasov komandalas áriptesinen dop aldy. Sodan keıin birneshe qarsylasyn aldap ótti. Sosyn alystan dopty shirene teýip, qarsylastar qaqpasyn týlatty. Aıta keterligi, bul Marın Tomasovtyń bıylǵy eýrokýbok oıyndarynda soqqan jetinshi goly sanalady.

Elordalyq fýtbolshylar birinshi kezeńde budan keıin de kóptegen shabýyldar uıymdastyrǵan edi. Degenmen olardyń barlyǵy dittegen jerine jetken joq. Birinshi kezeńniń sońynda oń qanattan áýelete berilgen dopty «Astana» oıynshysy Iýrıı Logvınenko baspen qaqpaǵa soǵyp ketti.

Ekinshi kezeń bastalǵannan keıin kóp uzamaı «Astana» esepti ústemeleı tústi. BATE qaqpasyna belgilengen penaltıdi Rýnar Sıgýrıonsson sheber oryndaı bildi. Budan keıin qos komanda tarapynan esepti ózgertetin múmkindikter boldy. Dese de oıyn sońyna deıin budan basqa gol soǵylǵan joq.  «Astana» qarsylasynan 3:0 esebimen basym tústi.

Eki komanda budan burynǵy jyldarda da eýrokýbok oıyndarynda kezdesti.  Belarýs klýby 2016 jyly Eýropa lıgasy pleı-off kezeńinde elordalyq «Astana» klýbymen jolyqty. Alǵashqy kezdesýde BATE syrt alańda olar qarsylasyna 0:2 esebimen jol berse, araǵa apta salyp óz alańynda 2:2 esebimen teń tústi. Osylaısha, «Astanadan» aınalyp óte alǵan joq.  Odan buryn 2013 jyly Chempıondar lıgasy ekinshi irikteý satysynda Qaraǵandynyń «Shahteryna» ese jibergen edi.

Endi qarymta oıyn 29 tamyzda Borısov qalasynda ótkiziledi.

Sońǵy jańalyqtar