15 Sáýir 2019, 10:10 803 0 Qoǵam Dınara MYŃJASARQYZY

Qazaqstan men Ózbekstan: taýar aınalymy 5 mlrd dollarǵa jetpek

Qazaqstan prezıdenti mingen ushaq 14 sáýirde Islam Karımov atyndaǵy áýejaıǵa qondy. Toqaevty Ózbekstan premer-mınıstri Abdýlla Arıpov, syrtqy ister mınıstri Abdýlazız Kamılov jáne Tashkent meri Johangır Artyqqojaev qarsy aldy dep habarlady jergilikti aqparat agenttikteri.

Qazaqstan prezıdenti suqbatynda eki eldiń strategııalyq yntymaqtastyǵynyń nyǵaıýyna elbasy Nursultan Nazarbaev pen Ózbekstan prezıdenti Shavkat Mırzııaev eleýli úles qosty dep atap ótken.

«Qazir mańyzdy mindetterdiń biri saýda-ekonomıkalyq baılanysty arttyryp, shekaralyq qarym-qatynasty tereńdetý. Bul salada bizdiń elimizdiń úlken múmkindigi bar. Eki úkimetke 2020 jylǵa qaraı taýar aınalymyn 5 mlrd dollarǵa jetkizý jóninde tapsyrma berilgen», - dedi Toqaev.

Toqaevtyń sózinshe, Qazaqstan men Ózbekstan arasynda sheshimi tabylmaıtyn másele joq. Ol eki el dostyǵynyń ári qaraı da máńgi jalǵasa beretinine senimdi ekenin jetkizdi.

Buǵan deıin eki el ekinshi prezıdentteriniń alǵashqy kezdesýinde «mańyzdy» qujattarǵa qol qoıylatyny habarlanǵan. Saparda ádettegideı saýda, áleýmettik-gýmanıtarlyq máselelerge qosa kólik-tranzıt máselesi de talqylanbaq. Toqaev sonymen birge Ózbekstandaǵy Qazaqstan jylynyń saltanatty ashylý rásimine qatyspaq. Sapar aıasynda prezıdenttiń BAQ ókilderine arnalǵan brıfıngi de josparlanǵan.

Sońǵy jańalyqtar