16 Naýryz 2019, 11:06 1307 0 Sport Nazym Toılybaeva

Danııar Eleýsinov kásipqoı rıngte 6 ret jeńiske jetti

Qazaqstandyq boksshy Danııar Eleýsinov (5-0, 3 KO) kásipqoı rıngtegi altynshy jekpe-jegin ótkizdi, dep habarlaıdy QazAqparat Sports.kz saıtyna silteme jasap.

Eleýsinov AQSh-tyń Fıladelfııa qalasynda búgin tańsáride ótken boks keshiniń anderkartynda óner kórsetti. Olımpıada chempıonynyń qarsylasy 36 jastaǵy meksıkalyq Sılverıo Ortıs (37-23, 18 KO) boldy. Jartylaı orta salmaqtaǵy aıqas segiz raýndtan turdy. Nátıjesinde ol tóreshilerdiń biraýyzdy sheshimimen upaı sany boıynsha Danııardyń paıdasyna aıaqtaldy.

Osylaısha, qazaqstandyq boksshy profı-rıngte altynshy ret jeńiske jetti. Ol aldyńǵy úsh jekpe-jegin nokaýtpen aıaqtaǵan bolatyn. Sılverıo Ortıs bolsa, óz mansabynda 24-inshi ret jeńildi.

Eske salaıyq, Danııar Elesýinov kásipqoı boksshy retinde alǵash ret ótken jyldyń sáýir aıynda judyryqtasqan bolatyn. Bıyl chempıondyq beldikter úshin aıqasa bastaıtyny kútilýde.

Danııardyń aıtýynsha, meksıkalyq qarsylasyn nokaýtqa jiberýge múmkindik bolǵan.

«Insaıdta jumys istep, alǵa kóbirek umtylý - men úshin jańasha ádis boldy. Men bapkerlik shtabty aýystyrdym jáne Korı Spınks menimen bir aı kóleminde jumys istedi. Jetinshi raýndta ony nokaýtqa jiberýge múmkindik boldy. Oǵan qysym kórsete bastadym. Onyń soqqylaryn ustap qalyp, kontratakaǵa jıi barýym kerek edi. Sondaı-aq ınsaıdtaǵy qorǵanysqa da mán berýim qajet edi», - dep keltiredi onyń sózin The Ring jýrnaly.

Qazaqstandyq boksshynyń altynshy aıqasyna qatysty pikirin Korı Spınks te bildirdi.

«Danııar meni tyńdaı biletinin kórsetti. Ol áli de daıyndyq ústinde. Onymen jumys istegenime bir aı ǵana boldy. Ony áýesqoı stılden aryltyp, soqqylaryn anaǵurlym qýatty etýge tyrysyp jatyrmyn. Ol óte talantty jigit. Barlyq atrıbýttaryn tolyqqandy qoldanǵanyn kórgim keledi», - dedi Spıks The Ring-pen suhbatynda.

 

Sońǵy jańalyqtar