28 Jeltoqsan 2016, 00:02 2093 0 Aımaq Dınara MYŃJASARQYZY

"Almas qylysh" kórkem fılmi jaryq kórdi

Qazaq handyǵynyń qurylý tarıhyn baıandaıtyn "Almas qylysh" kórkem fılmi jaryqqa shyqty. "Qazaq eli" teleserıalynyń kıno nusqasynyń aldyn-ala kórsetilimin tamashalaǵan BAQ ókilderi  men tarıhshylar joǵary baǵasyn berip jatyr.

Tarıhı kınotýyndy Esenberlınniń «Kóshpendiler» trılogııasynyń jelisimen túsirilgen. Shyǵarmany óńdep, kınoǵa yqshamdaǵan jazýshy  -  Smaǵul Elýbaı. Al, jobanyń avtory - Prezıdent Nursultan Nazarbaev. Bul «Qazaqfılm»  kınostýdııasy ujymynyń Táýelsizdiktiń 25 jyldyǵyna jasaǵan úlken tartýy.

HÚ ǵasyrda Ábilqaıyr handyǵynan irgesin bólip, óz aldyna jeke memlekettiń týyn tikken Alash jurtynyń alǵaýsyz armany, Kereı men Jánibek handardyń erlik joly dáripteletin týyndy 5 aı boıy 500-den astam adamnyń qatysýymen túsirilgen. Ilııas Esenberlınniń "Almas qylysh" romany jelisimen túsirilgen fılmniń  mazmundyq máni zor deıdi tarıhshylar.

Tarıh ǵylymdarynyń doktory, professor Talas Omarbekov: "Bul kınoda asa baǵaly nárseniń biri Qurannyń kórsetilýi. Quranny orny. Qazaq handyǵy tarıhynda ıslam dini resmı ıdeologııa bolyp qalyptasqany ras" dedi.

Rejısserdiń aıtýynsha, túsirilim eki nusqaǵa qatar júrgizilgendikten azdaǵan qıyndyqtar týǵan. Odan bólek bir jyldan beri elge málim týyndynyń qarjy máselesi jan-jaqty kómekterdiń arqasynda sheshilip, qazir jobaǵa qatysty jumystardyń barlyǵy aıaqtalǵan. Rústem Ábdirashev endi osy eńbekti elge tanytý, jurtqa nasıhattaý kerek deıdi.

Kıno Almaty jáne Almaty oblysy aýmaǵynda túsirilgen. Kórinister úshin 30 nysan paıdalanyp, fılm kompozıtory 25 jańa mýzykalyq týyndymen árlegen. "Almas qylysh" 5 qańtardan bastap, elimizdiń kınoteatrlarynan kórsetile bastaıdy.

 

Sońǵy jańalyqtar