27 Jeltoqsan 2016, 15:33 3238 0 Qoǵam Dınara MYŃJASARQYZY

Kitaphana sandyq júıege kóshedi

Qazaqstanda 2020 jylǵa qaraı barlyq kitaphana qory sandyq júıege ótedi. Atalǵan sandyq júıe kitaphana qyzmetiniń damýyna oń yqpal etip, kitaphana qoryn qurý, saqtaý jáne odan ári damytýǵa jańa múmkindikter beredi, dep habarlaıdy QR Úkimetiniń baspasóz qyzmeti.

«Bul Qazaqstandaǵy barlyq kitaphanalardyń biryńǵaı elektrondy katalogyn qurýǵa kómektesedi. Munyń izin ala Qazaqstan «TMD elderiniń elektrondy kitaphanasy» jobasyna qosylady. Bul jaǵdaıda reseılik qorlarda saqtaýly turǵan erekshe kitaptar bizdiń azamattar úshin de qoljetimdi bolmaq. Sonymen bir ýaqytta respýblıkada alǵash ret sırek ári erekshe kitaptar men qoljazbalardyń ortalyǵy ashylady», - dep atap ótti QR Premer-Mınıstriniń orynbasary Imanǵalı Tasmaǵambetov.

Sonymen qatar, oqýshylar úshin ádebıet páni boıynsha mektep baǵdarlamasyna úzdik zamanaýı avtorlardyń shyǵarmalary engiziledi. Al, elimizdiń jas turǵyndaryna arnalǵan ádebı shyǵarmalardy tegin jarnamalaýǵa múmkindik berý qarastyrylǵan. Qazaqstandyqtardyń kitap oqýǵa degen qyzyǵýshylyǵyn arttyrý maqsatynda kitap oqýdy qoldaý jóninde vedomstvoaralyq keńes qurylady.

 

Sońǵy jańalyqtar