13 Sáýir 2015, 16:12 2680 0 Mýltımedıa Názııa JOIaMERGENQYZY

Túrki elderinen «Jyldyń eń úzdigi» atanǵandar marapattaldy

Túrkııanyń Adyıaman qalasynda Túrki elderiniń eń úzdik jeńimpazdaryn marapattaý sharasy ótti. Jyl saıyn eń úzdik jýrnalıst, sheneýnik, saıasatker, ánshi t.b. arasynda ótkiziletin GAP Oskar saıysynyń bıylǵy jeńimpazdary anyqtaldy.

Adyıaman ýnıversıtetiniń saltanat zalynda uıymdastyrylǵan bul jıynda syılyqtardy tabystaý sharasyn birneshe telearna tikeleı efırden kórsetti. Saltanatty sharada sóz alǵan GAP Jýrnalıster birliginiń basshysy Zeınel Abıdın Kyımazdyń aıtýynsha, ústimizdegi jyly saıysqa Ázirbaıjan, Soltústik Kıpr Túrkııa memleketi, Bolgarııa, Kosova, Rýmynııa, Irak, Sırııa, Shyǵys Túrkistan, Marokko, Albanııa elderinen úmitkerler qatysqan. Qatysýshylar men jeńimpazdardy merekemen qutyqtaǵan Adyıaman qalasynyń ákimi Húsref Kýtlý ózi basqaratyn qalanyń tynyshtyq pen yntymaqtastyq mekenine aınalǵanyn aıtty. Sonymen, «Eń úzdik saıasatker» ataǵyn bıyl Adyıaman qalasynan saılanǵan AKR partııasynyń depýtaty Ahmet Aıdyn qanjyǵaǵa baılady. Quttyqtaý sózinde: «Saıasatkerlerdiń eń jaqyn dostarynyń qataryndaǵy jýrnalısterdiń de marapatqa ıe bolǵany qýantady. Óıtkeni men qol jetkizgen tabystarda jýrnalısterdiń de úlesi bar», – dedi. Qala gýbernatory Mamýt Demırtash: «Anadolyny Mezopotamııaǵa jalǵaǵan Adyıaman búgingi keremet keshti uıymdastyryp otyr. Demokratııalyq mádenıettiń damýynda buqaralyq aqparat quraldarynyń yqpaly zor. GAP Jýrnalıster odaǵy qurylǵaly beri osy baǵyttan taıǵan emes. Taratatyn aqparattary men habarlary arqyly aımaqtaǵy qıyndyqtar men keleńsizdikterdi joıýǵa, óńirdi nasıhattaýda zor úles qosýda», – dedi.

«Jyldyń eń úzdik jýrnalısi» ataǵyna ıe bolǵan áriptesimiz Metın Harykchy: «Bul syılyqty men búkil jýrnalısterdiń arqasynda jáne barlyq áriptesterimniń atyna aldym», – dep aǵynan jaryldy. «Jyldyń eń úzdik saıasatkeri» ataǵyna ıe bolǵan – Ázirbaıjan Májilisiniń depýtaty Ganıre Bashaeva. Al Merdjaan TV arnasynyń júrgizýshisi Mustafa Aloǵlunyń «Alaoǵlu men aptaǵa sholý» baǵdarlamasy «Jyldyń eń úzdik telebaǵdarlamasy» atandy.

Sońǵy jańalyqtar