13 Tamyz, 20:31 899 0 Saıasat Anar LEPESOVA

Elbasy: Daǵdarysqa qaramaı, ulttyq qaýipsizdikti qamtamasyz etýimiz kerek

Elbasy, Qaýipsizdik Keńesiniń Tóraǵasy Nursultan Nazarbaev Premer-Mınıstr Asqar Mamınmen kezdesti, dep habarlaıdy Elbasy.kz.

Kezdesý barysynda bıylǵy 7 aıdyń qorytyndysy boıynsha elimizdiń ekonomıkalyq damý nátıjeleri men pandemııadan keıingi kezeńge arnalǵan jumys jospary talqylandy.

Premer-Mınıstrdiń usynǵan málimeti boıynsha, jyl basynan beri ekonomıkanyń mashına jasaý, óńdeý jáne taý-ken óndirisi, qurylys, basqa da negizgi salalaryndaǵy kórsetkishter oń qarqyn alǵan.

Elbasy Qazaqstanda buǵan deıin qabyldanǵan memlekettik baǵdarlamalar qazirgi daǵdarystyń ulttyq ekonomıkaǵa teris áserin azaıtýǵa múmkindik bergenin atap ótti.

«Biz táýelsizdik jyldaryndaǵy eń kúrdeli kezeńdi bastan ótkerip jatyrmyz. Osy ýaqyt ishinde talaı daǵdarysty eńserdik. Qazirgi qıyndyq álemniń búkil elin qamtyp otyr. Barlyq jerde jumyssyzdyqtyń kóbeıýi baıqalýda, bıznes qıyndyqtarǵa tap bolyp, memleketter arasyndaǵy saýda-sattyq deńgeıi tómendedi. Alaıda buǵan deıin qabyldanǵan sharalar daǵdarystyń ekonomıkamyzǵa áserin azaıtýǵa kómektesti. Bizdiń ekonomıkalyq kórsetkishterdiń tómendeýi basqa eldermen salystyrǵanda úsh ese az», – dedi Nursultan Nazarbaev.

Qazaqstannyń Tuńǵysh Prezıdenti kúrdeli kezeńdegi eldiń áleýmettik-ekonomıkalyq damýyn qoldaý baǵytynda otandyq bıznestiń belsendiligi joǵary ekenin atap ótti.

«Iri bıznes jumys oryndaryn saqtap qalýǵa kómektesti, halyqtyń álsiz toptaryn qoldaýǵa qarajat bóldi, sondaı-aq «Biz birgemiz» bastamasyn ilgeriletýge úlesin qosty. Men barlyq bıznes ókilderine rızashylyǵymdy bildiremin. «Birgemiz» qory arqyly biz 2,3 mıllıon qazaqstandyqqa qoldaý kórsete aldyq», – dedi Elbasy.

Nursultan Nazarbaev daǵdarystan keıingi kezeńdegi ekonomıkalyq ósim máselesin qarastyryp, otandyq bıznesti jandandyrý jáne azamattardyń ál-aýqatyn jaqsartý qajettigin atap ótti. Úkimet ekonomıkanyń túrli salasyndaǵy ósimdi qamtamasyz etý úshin naqty sharalar qabyldaýy kerek ekendigi aıtyldy.

«Qazirgi ýaqytta sarapshylar ekonomıkalyq daǵdarys pen pandemııanyń ekinshi tolqyny keletinin boljaýda. Mamandar bul máseleni muqııat zerttep, osy jaǵdaıǵa arnaýly baǵdarlama ázirleýi kerek. Jańa tásilder men tıisti sharalar qajet», – dedi Qazaqstannyń Tuńǵysh Prezıdenti.

Sonymen qatar Elbasy koronavırýs ınfekııasynyń taralýyna qarsy kúres aıasyndaǵy aqparattyq-túsindirý jumystary máselesine toqtaldy.

«Qaýipti dertti juqtyryp almaý adamnyń ózine jáne tártibine baılanysty ekenin túsindirgen memleketter utylǵan joq. Keıbir elderde karantın sharalary qabyldanbady, óıtkeni adamdar saqtyq sharalaryn saqtap, mamandardyń talabyn oryndady», – dedi Nursultan Nazarbaev.

Qazaqstannyń Tuńǵysh Prezıdenti geosaıası qaqtyǵystar men qarama-qaıshylyqtar órship turǵan jaǵdaıda Qazaqstan qoǵamynyń birligi men turaqtylyǵyn saqtaýdyń mańyzdylyǵyn atap ótti.

«Bizdiń basty mindetimiz – daǵdarysqa qaramaı, elimizdiń ulttyq qaýipsizdigin qamtamasyz etý. Ishki turaqtylyqty saqtaýymyz kerek. Qoǵam tutastyǵy men saıası turaqtylyq – bizdiń alǵa jyljýymyzdyń negizi ekenin jurtshylyq esten shyǵarmaǵany jón. Biz árdaıym memlekettiń jáne «Nur Otan« partııasy sııaqty saıası kúshtiń aınalasyna toptasý arqyly daǵdarystardy eńsere bildik. Bul synaqtan da aman ótetinimizge senimdimin. Ekonomıkanyń ósimi qamtamasyz etiletin bolady. Bul qazaqstandyqtardyń turmys-tirshiligine oń yqpal etedi. Memleket qaıtadan qarjy jınaqtaıdy. Ol qarajat qazaqstandyqtardyń ıgiligi úshin, sondaı-aq «Qazaqstan-2050» strategııalyq baǵdarlasynyń oryndalýyna paıdalanylatyn bolady», – dedi Elbasy.

Kezdesý sońynda Nursultan Nazarbaev jahandyq ekonomıkalyq daǵdarystardan ótýde Qazaqstannyń mol tájirıbesi, sondaı-aq ekonomıkanyń turaqty ósimin qamtamasyz etýge múmkindigi bar ekenin atap ótti.

«Jurt jumysqa shyǵyp, aqsha tabýy úshin Úkimet jumys oryndaryn kóbeıtýge tyrysýy kerek. Bizde úlken tájirıbe, qarajat, múmkindikter bar. Osynyń bárinen súrinbeı ótemiz», – dedi Qazaqstannyń Tuńǵysh Prezıdenti.

 

Sońǵy jańalyqtar