13 Tamyz, 18:20 508 0 Jańalyqtar Araılym Bımendıeva

«Ulttyq aýdarma bıýrosy»: 30 jańa oqýlyq aýdaryldy

«Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda bıyl qazaq tiline 30 jańa oqýlyq aýdaryldy. Oqýlyqtardyń jańa toptamasy kınotaný, teatrtaný, óner, etıka, estetıka, medıa, tarıh, mıkro jáne makro ekonomıka men bıznes, jeke qarajat, saıasattaný, sondaı-aq, azamattyq is-júrgizý quqyǵy men ıntellektýaldyq menshik quqyǵy, pedagogıka jáne statıstıka sekildi salalardy qamtıdy.

Elimizdiń mádenı shyǵarmashylyq baǵyttaǵy oqý oryndarynyń usynysy boıynsha, bul jolǵy aýdarma aıasynda kınotaný, senarıı jazý, teatrtaný, mýzyka tarıhy men ónertaný baǵytyndaǵy oqýlyqtarǵa basymdyq berildi. Óner akademııalarynan kelgen usynystarǵa sáıkes atalǵan óner men bilim salalarynda álemge tanymal avtorlardyń qundy eńbekteri tańdap alyndy.

Atap aıtsaq, franýz fılosofy Jıl Delózdiń «Kıno 1. Qozǵalys-beıne» jáne «Kıno 2. Ýaqyt-beıne» atty eki tomdyq, kınony fılosofııalyq shyǵarma turǵysynan tanystyratyn klassıkalyq týyndysy tuńǵysh ret qazaq tilinde jaryq kórdi. Sondaı-aq, jańadan aýdarylǵan oqýlyqtardyń ishinde kıno men televızııa mamandary úshin asa qundy bolar «Kınosenarıı. Senarıı jazý negizderi» dep atalatyn oqý quraly bar. Klassıkalyq negizdegi bul oqý quraly koneptiden daıyn senarıı shyǵarýǵa deıingi satyly nusqaýlyq usynady. Oqýlyq 30 ret qaıta basylyp, álemniń 20-dan asa tiline aýdarylǵan.

Atalǵan 30 oqýlyqtyń árqaısysy 10 myń dana basylymmen shyǵarylyp, elimizdegi 132 JOO-ǵa taratylady. Oqýlyqtardyń elektrondy nusqalary «Qazaqstannyń ashyq ýnıversıteti» (www.openU.kz) portalyna ornalastyrylyp, ınternet arqyly erkin qoldanysqa berildi.

Sondaı-aq, aýdarylǵan jáne aýdarylyp jatqan oqýlyqtardyń negizinde qazaq jáne orys tilderinde mýltımedıalyq onlaın kýrstar ázirlenip, olar «Qazaqstannyń ashyq ýnıversıteti» (www.openU.kz) portalyna júkteldi.

Aýdarma jáne basylymdardy daıyndaý jumysyna Qazaqstannyń aldyńǵy qatarly oqý oryndarynyń ǵalymdary, tájirıbeli aýdarmashylar, tilshiler men ádebıetshiler ortasynan iriktelgen redaktorlar, jalpy sany 300-den asa maman qatysýda.

Sońǵy jańalyqtar