13 Tamyz, 12:49 579 0 Óner Anar LEPESOVA

Álemdegi eń tabysty ártisterdiń tizimi jarııalandy

Forbes álemdegi eń tabysty ártisterdiń tizimin jarııalady. Basylym saıtynda jarııalanǵan tizimde Dýeın Djonson kósh bastap tur. 

Ótken jyly da Djonson eń joǵary aqy tólenetin ártis dep tanylǵan bolatyn. Forbes-tyń jazýynsha, onyń jyldyq tabysy - 87,5 mıllıon dollar. Máselen, bıyl Netflix-te shyǵatyn «Qyzyl habarlama» (Red Notice) fılmindegi róli úshin ártis 23,5 mıllıon dollar qalamaqy alǵan.

Al jyldyq tabysy 71 mıllıon dollarǵa baǵalanǵan kanadalyq ártis Raıan Reınolds ekinshi orynnan kórindi.  Akter «Bulyńǵyr altylyq» (6 Underground) jáne «Qyzyl habarlama» (Red Notice) fılmderindegi rólderi úshin 20 mıllıon dollardan asa tabys tapqan.

Tizimdegi úshinshi oryn jyldyq tabysy 58 mıllıon dollardy quraıtyn amerıkalyq Mark Ýolbergke buıyrdy. Ol  «Mak-Mıllıondar» (McMillions) jáne «Ýoll-strıt» (Wahl Street) derekti fılmderiniń prodıýseri retinde eńbektenip, osynsha tabysqa qol jetkizgen.

Sondaı-aq, reıtıngtiń alǵashqy ondyǵynda Ben Afflek ($55 mln), Vın Dızel ($54 mln), Akshaı Kýmar ($48 mln), Lın-Manýel Mıranda ($45,5 mln), Ýıll Smıt ($44,5 mln), Adam Sendler ($41 mln) jáne Djekı Chan ($40 mln) bar.

 

Sońǵy jańalyqtar