11 Tamyz, 09:49 1592 0 Qoǵam Anar LEPESOVA

Premer-mınıstr karantındi kezeń-kezeńimen alýdy tapsyrdy

Densaýlyq saqtaý mınıstrligi karantın sharalaryn kezeń-kezeńimen alyp tastaý josparyn memlekettik komıssııa qaraýyna beısenbi kúni engizýi tıis. Úkimet otyrysynda Asqar Mamın osyndaı tapsyrma berdi.  

«Jalpy qabyldanǵan keshendi sharalardyń nátıjesinde elimizdegi koronavırýstyń taralýy deńgeıi jáne osyǵan baılanysty barlyq kórsetkishter qarqyndy tómendeýi tirkelip otyr. Sonyń ishinde vırýstyq reprodýktıvtilik deńgeıiniń ortasha kórsetkishi 0,82 paıyzǵa deıin tómendedi. Emdelip shyqqandardyń úlesi 73,6 paıyzdy qurap otyr. Qalǵandary qajetti em alyp jatyr», - dedi Asqar Mamın.

Úkimet basshysy aýrýhanalardyń júktemesi 61 paıyzǵa, jedel járdem shaqyrý 62 paıyzǵa tómendegenin atap ótti.

«Qalyptastyp otyrǵan epıdemıologııalyq jaǵdaıdy eskere otyryp Densaýlyq saqtaý mınıstrligine karantın sharalaryn kezeń-kezeńimen alyp tastaý josparyn memlekettik komıssııa qaraýyna beısenbi kúni engizýdi tapsyramyn», - dedi Premer-mınıstr.

Eske sala ketsek, buǵan deıin QR Densaýlyq saqtaý mınıstrliginiń resmı ókili Baǵdat Qojahmetov elimizde koronavırýsty juqtyrý ósimi toqtaǵanyn málimdedi. Onyń aıtýynsha, endigi mindet – indetti juqtyrý men ólim-jitimdi toqtatý.

Mınıstrliktiń sońǵy deregi boıynsha, Qazaqstanda koronavırýs juqtyrǵandar sany 100 myńnan asty. Indetten 73,7 myń adam emdelip shyqty. 1269 adam kóz jumdy.

 

Sońǵy jańalyqtar