9 Tamyz, 15:21 816 0 Qaýipsizdik Anar LEPESOVA

Almaty oblysynda kópqabatty úı órtenip, 5 adam zardap shekti (vıdeo)

Búgin túnde Almaty oblysynyń Qarasaı aýdanynda bolǵan órtten úsh eresek adam men eki bala zardap shekti. Bul týraly óńirdiń Tótenshe jaǵdaılar departamentiniń baspasóz qyzmeti habarlady.

Órt sóndirý qyzmetiniń jeke quramy túngi 12.30-da órt shyqqany týraly habar alǵan. Qaskeleń qalasynda ornalasqan 9 qabatty turǵyn úıdiń úshinshi qabatyndaǵy páter órtengen. Órtti sóndirýge tek jergilikti órt sóndirý qyzmetteri ǵana emes, sonymen birge Almatydaǵy áriptesteri de attandy.

Oqıǵa ornyna jetken órt sóndirý brıgadalary joǵarǵy qabattaǵy turǵyndardyń qalyń tútinniń kesirinen úıinen shyǵa almaı jatqanyn baıqaǵan. Órtti sóndirý kezinde órt sóndirýshiler 25 adamdy qutqardy.

Jalpy alǵanda, turǵyn úı kesheninen úsh júzge jýyq adam qaýipsiz jerge kóshirildi, keıbiri ózdigimen shyǵa aldy, al keıbireýleri órt sóndirýshilerdiń kómegine muqtaj boldy. Órtti aýyzdyqtaýǵa 40 mınýt ýaqyt qajet boldy. Osy ýaqytqa deıin órt 15 sharshy metrge jaıylyp úlgergen.

Oqıǵanyń sebebi áli anyqtalǵan joq, tek turmystyq zattar men jıhazdar órtengeni belgili boldy.

Zardap shekkenderdiń biri 51 jastaǵy úı ıesi, onyń 26 ​​jastaǵy uly jáne 11 jasar týysy. Olardyń denesi kúıik shalyp, aýrýhanaǵa jetkizildi. Sonymen qatar, olardyń kórshileri, 36 jastaǵy er adam jáne 10 jasar bala janǵan zattardan bólingen ıisine ýlanyp, aýrýhanaǵa jetkizildi. Órtti sóndirýge Almaty oblysy men Almaty qalasynyń Tótenshe jaǵdaılar departamentinen 33 adam men 7 tehnıka jumyldyryldy.

Sońǵy jańalyqtar