1 Tamyz, 18:44 553 0 Jańalyqtar Anar LEPESOVA

COVID-19: Ońtústik Amerıka elderinde indet órshidi

Ońtústik Amerıka elderinde koronavırýs órship barady. Indettiń taralý qarqyny artqan memleketter shekteý sharalaryn kúsheıtýge májbúr. 

Perýde tótenshe jaǵdaı rejımi taǵy bir aıǵa uzartyldy. Óıtkeni elde indettiń beti qaıtar emes. 30 shilde kúni el aýmaǵynda koronavırýs juqtyrǵan 7 myńdaı adam anyqtaldy. Perý aýrýhanalary naýqastarǵa lyq toly, aýyrǵan adamdarǵa kómek beretin dárigerler qat.

Perý koronavırýsty juqtyrý sany boıynsha Ońtústik Amerıkada Brazılııadan keıin ekinshi tur. 33 mıllıon halqy bar bul elde 400 myńnan asa adam indetke shaldyqqan. Al qaıtys bolǵandardyń sany 19 myńnan asyp jyǵyldy. Aq halattylardyń pikirinshe, shynaıy statıstıka budan áldeqaıda kóp bolýy múmkin. Óıtkeni kóptegen jaǵdaıda ólim sebebi retinde koronavırýs saldarynan asqynǵan ózge aýrýlar jazylǵan.

Perý densaýlyq saqtaý mınıstri Pılar Maettıdiń aıtýynsha, túrli sebepterden qaıtys bolǵan 46 myń adamda koronavırýs anyqtalǵan. Atalǵan derekter boıynsha  komıssııa taldaý jumystaryn júrgizip jatqan kórinedi.

Bolıvııada da qatań shekteý sharalary taǵy bir aıǵa uzartyldy. Ońtústik Amerıkadaǵy eń kedeı memleketterdiń biri sanalatyn bul elde densaýlyq saqtaý júıesi indetpen kúresýge qaýqarsyz. Aýyrǵandardyń kóbi óz úılerinde emdelýde.

Pandemııa bastalǵaly 11 mıllıon halqy bar Bolıvııada 75 myńnan asa adam koronavırýs juqtyrǵan. Naýqastardyń 3 myńy kóz jumdy.

Eske sala keteıik, Dúnıejúzilik densaýlyq saqtaý uıymy bir táýlik ishinde koronavırýs indetin juqtyrý kórsetkishi boıynsha jańa rekord tirkedi.

Sońǵy táýlikte álemde 292 myńnan astam adamnan koronavırýs anyqtalǵan. Buǵan deıin qaterli vırýsty juqtyrǵandar boıynsha eń kóp adam 25 shildede tirkelgen. Sol kúni 286 myń adamnan vırýs anyqtalǵan edi.

Sońǵy jańalyqtar