31 Shilde, 16:41 490 0 Jańalyqtar Asyl TUMAR

«Nur Otan» partııasy qazaqstandyqtardy Qurban aıt merekesimen quttyqtady

«Nur Otan» partııasynyń Almaty qalalyq fılıaly barsha qazaqstandyqtardy álemdegi kúlli musylmandar úshin qasıetti Qurban aıt merekesimen shyn júrekten quttyqtaıdy! Qurban aıt – izgilik pen meıirbandyqtyń, jaqsylyq pen qaıyrymdylyqtyń meıramy.

Júregine ıman uıalaǵan árbir adam jaqsy ister jasaýǵa, kómekke muqtaj jandarǵa qolushyn sozyp, aınalasyna qýanysh syılaýǵa tyrysady.
Memleket basshysy Qasym-Jomart Toqaev «Tarıhymyzben tamyrlas, tanymymyzben ózektes Qurban aıt Qazaqstan halqyn beıbitshilik pen tatýlyqqa, ózara syılastyqqa, bereke-birlikke úndeıdi. Imandylyq pen parasattylyqty, jasampazdyq pen meıirimdi dáriptep, jaqsylyqqa jol ashady» dep aıtqan bolatyn.

Osy ustanymnan «Nur Otan» partııasynyń músheleri de shet qalyp jatqan joq. Partııa músheleri Dolkýntaı Abdýhalıl Almaly aýdandyq fılıalymen birigip, qaladaǵy 300-ge jýyq medıına qyzmetkeri men aýdannyń 150 kómekke asa muqtaj turǵynynyń árqaısysyna salmaǵy 30 kelini quraıtyn azyq-túlik sebetterin tabystasa, «DacoMotorsKZ» kompanııasynyń dırektory Nurymbek Taý da 10 otbasyna kómektesti. Nurymbek myrzanyń jalpy sany 50 otbasyǵa kómektesý jospary bar.

Sonymen qatar, partııa músheleri, qalalyq máslıhat depýtaty Ámirjan Nábıev qurbandyqqa shalǵan mal etin asa muqtaj 5 otbasyna shubatpen qosyp taratsa, energetıka kolledjiniń dırektory Muhamedjan Taıtóleev ótken aptadan bastap Áýezov aýdanynyń turmysy tómen jáne kópbalaly 20 otbasyna azyq-túlik sebetterin, medıınalyq maska, qajetti dári-dármek pen et jetkizdi.

Sondaı-aq adamdar kóp shoǵyrlanatyn jerlerdegi turǵyndarǵa jalpy sany 2500 betperde taratty.

«Bizdi umytpaı, únemi qoldaý bildirip, kómek kórsetip jatqany úshin meniń «Nur Otan» partııasyna aıtar alǵysym sheksiz. 50 myń teńge materıaldyq kómek te aldym. Endi qasıetti merekeniń qarsańynda taǵy da meniń úlken otbasyma kómektesti», – dedi kópbalaly ana.

Bul mereke Qazaqstan halqynyń ulttyq biregeıligin, ıgi qundylyqtaryn, san ǵasyrlyq mádenı jáne tarıhı muralaryn saqtap, odan ári damyta túsýge septigin tıgizedi.

Búgingi qasıetti meırammen quttyqtaı otyryp, «Nur Otan» partııasynyń Almaty qalalyq fılıaly barsha qazaqstandyqtarǵa zor densaýlyq, baqyt, tynyshtyq, amandyq pen ósip-órkendeýdi tileıdi!
Aıt qabyl bolsyn!

Sońǵy jańalyqtar