15 Shilde, 19:42 853 0 Jańalyqtar Anar LEPESOVA

Karantın kezinde toı jasaǵandar qylmystyq jaýapkershilikke tartylady

Karantındik shekteýlerge qaramastan toı jasaǵandardy qandaı jaza kútip tur? Bul saýalǵa Ádilet mınıstri Marat Beketaev jaýap berdi.

«Mundaı jaǵdaıda tıisti Zań babyna sáıkes, alǵashqy jaǵdaıda aıyptalýshyǵa 83 myń teńge kóleminde aıyppul salynady. Eger mundaı sharalardyń barysynda azamattar jappaı vırýs juqtyrsa, aıyppuldyń da kólemi aıtarlyqtaı kóp bolady. Al oqıǵanyń saldary jaǵymsyz jaǵdaıǵa aparsa, qylmystyq is te qozǵalýy yqtımal», - dedi mınıstr.

Sondaı-aq, vedomstvo basshysy kóktemgi karantın kezinde tártip buzǵandarǵa aıyppul salynbaý sebebin túsindirdi.

«Tártip qataıa tústi. Qazirgi ýaqytta bul erejeler qoǵamdyq oryndaǵy, jabyq nysandardaǵy jáne kóliktegi azamattardyń áreketine baılanysty. «Olar ózin qalaı ustaýy kerek? Erejeni buzsa, qalaı jazalanady? Zańbuzýshyǵa qandaı ákimshilik jaza taǵaıyndaý kerek?» degen suraqtar tóńireginde pikirtalas kóp boldy. Kóktemde QR ÁQBjK 476-baby qoldanylsa, qazir 425-bap boıynsha azamattar jazalanyp jatyr», - dedi M.Beketaev.

Eske sala keteıik, Úkimet epıdemıologııalyq ahýaldy odan ary turaqtandyrý úshin shekteý sharalaryn taǵy eki aptaǵa, 20 shildeden bastap 2 tamyzǵa deıin uzartý týraly sheshim qabyldady.

Memlekettik komıssııanyń sheshimi boıynsha atalmysh merzimge deıin elimizde oıyn-saýyq, sport jáne basqa da buqaralyq is-sharalardy, sondaı-aq otbasylyq, eske alý sharalaryn ótkizýge tyıym salynǵan.

Sońǵy jańalyqtar