13 Shilde, 22:02 809 0 Densaýlyq Baqytbek Qadyr

Óli razy bolmaı, tiri baıymaıdy – Kádirbek Segizbaı

Kádirbek SEGIZBAI, jazýshy, Qazaqstannyń eńbek sińirgen qaıratkeri:

– Qazaq qazaq bolǵaly talaı indetti bastan ótkizgen. Oba, súzik, sheshek sekildi neshe túrli juqpaly aýrýlar bolǵan. Basqasyn bylaı qoıǵanda meniń atalarymnyń týǵan-týystary 1897 jyly oba aýrýynan qyrylyp qaldy. Bul da sol sekildi mezgilsiz kelgen dert.

Halqymyzdyń amandyǵyn tilep, úıde otyrmyz. Aınalamyzda shyǵyn kóp. Nebir belgili asyl azamattarymyzdan aırylyp jatyrmyz. Belgisizderi qanshama. Másele belgili ıakı belgisizinde emes, árbir adam qundy. Qunsyz eshkim joq. Basynda «Almatydan 3 adam qaıtypty» dep shoshyp otyrýshy edik, qazir júzdep ketip jatyr. Osynyń bári úlken ókinish.

Sondyqtan bek saqtyq kerek. Qazaq «saqtyqta qorlyq joq» deıdi. Saqtansaq, qor bolmaımyz. Tártipke baǵynyp, óz-ózimizdi saqtaýymyz qajet.

Prezıdentimiz úndeý jarııalady. Qalaı bolǵanda osy indetti toqtataıyq dep júgirýde. Halyqty sabyrǵa shaqyryp jatyr. Biraq sonda da erkindikke úırenip qalǵan jurt tártipti áli durys saqtamaı jatyr. Osynyń bári aınalyp kelgende adamnyń ózin-ózi syılamaýy jáne aınalasyndaǵy eldi syılamaýy ǵoı.

Úndeýde 13 shilde aza tutý kúni dep jarııalandy. Bul óte durys nárse. Óli razy bolmaı, tiri baıymaıdy deıdi. Olar mezgilsiz kelgen derttiń qurbandary. Solarǵa qazir bir kúrek topyraq salýǵa jaramaı otyrmyz. Amal joq. Sondyqtan o dúnıelik bolǵan azamattardy eske alý – kerek bolsa tiriler úshin qajet nárse. Olardy eske alyp, sabaq alaıyq degen áńgime.

El aman bolsyn! Otyraıyq, shydamdy bolaıyq, amandyqta jolyqaıyq!

Sońǵy jańalyqtar