13 Shilde, 16:41 405 0 Jahan Anar LEPESOVA

Moldovada tótenshe jaǵdaı shildeniń sońyna deıin uzartyldy

Moldova aýmaǵynda tótenshe jaǵdaı 31 shildege deıin uzartyldy. Ulttyq qoǵamdyq densaýlyq saqtaý tótenshe komıssııasynyń búgingi otyrysynda osyndaı sheshim qabyldandy, dep habarlaıdy MOLDPRES

Komıssııa basshysy premer-mınıstr Ion Kıkýdyń aıtýynsha, mundaı sheshim eldegi epıdemıologııalyq ahýaldy turaqtandyrý úshin qabyldanyp otyr.

Qoǵamdyq densaýlyq saqtaý salasyndaǵy tótenshe jaǵdaı uzartylyp qana qoımaı, keıbir shekteýler saqtalady: sheteldikterdiń Moldova Respýblıkasyna kelýine, sharalar ótkizýge, mektepke deıingi mekemeler qyzmetine, demalys lagerlerine, túngi klýbtarǵa, saıabaqtarǵa, demalys aımaqtaryna jáne t.b.

Soǵan qaramastan, 16 shildeden bastap ońaltý ortalyqtary, sonyń ishinde kýrorttyq-shıpajaı mekemeleriniń qyzmeti kezeń-kezeńimen qaıta jandanbaq.

Eldiń densaýlyq saqtaý mınıstrliginiń málimetinshe, sońǵy táýlikte Moldova Respýblıkasynda 258 adamnan jańa koronavırýs anyqtalǵan. Memlekette qaterli vırýs juqtyrǵandardyń jalpy sany 18 924 adamǵa jetti.

Aıta keteıik, buǵan deıin Brazılııada bir táýlik ishinde 39 myń adamnan koronavırýs anyqtalyp,  indet juqtyrǵandardyń jalpy sany 1,8 mıllıonǵa jetkenin habarlaǵanbyz. Elde indet qurbandarynyń sany 71 myńnan asty.

Al AQSh-ta aldaǵy 2-3 aptada ólim-jitim kórsetkishi arta túsedi dep boljanýda. Eldiń densaýlyq saqtaý mınıstriniń kómekshisi Brett Jırýardyń aıtýynsha,  kúzde indettiń ekinshi tolqynynyń bastalý yqtımaldyǵy joǵary. Óıtkeni vırýs turǵyndardyń 90 paıyzyn áli sharpyp úlgermegen.

 

Sońǵy jańalyqtar