13 Shilde, 09:58 473 0 Qoǵam Anar LEPESOVA

Senat Tóraǵasy indet qurbandarynyń týǵan-týystaryna kóńil aıtty

Parlament Senatynyń Tóraǵasy Máýlen Áshimbaev koronavırýstan qaza tapqan jandardyń týǵan-týystaryna kóńil aıtty. 

"Memleket basshysy koronavırýs indetinen qaıtys bolǵan azamattardy eske alý úshin 13 shildeni Ulttyq aza tutý kúni dep jarııalaǵany belgili. Soǵan baılanysty búgin barsha Qazaqstan halqy aza tutýda.

Ókinishke qaraı, pandemııa saldarynan kóz jumǵan jandardyń qatarynda eldik muratty tý etken arystaı azamattarymyz, zııaly qaýym ókilderi, memleket jáne qoǵam qaıratkerleri, sondaı-aq, ózgeniń ómiri úshin sońǵy sátke deıin kúresip ótken dárigerlerimiz bar. Biz úshin dúnıeden ozǵan ár otandasymyzdyń orny bólek.

Osyǵan oraı indetten qaza tapqandardyń týystary men jaqyndaryna orny tolmas qaıǵylaryna ortaqtasyp, kóńil aıtamyn. Endi eshqashan mundaı qaraly kún bolmasyn! Elimiz aman, jurtymyz tynysh bolsyn!", - dedi Máýlen Áshimbaev.

Senat Tóraǵasy halqymyz óz basyna túsken barlyq synaqty yntymaq pen birliktiń arqasynda jeńgenin aıtyp, qazaqstandyqtardy indetpen kúreste kúsh biriktirýge shaqyrdy.

"Biz qabyldanǵan sharalardyń arqasynda pandemııanyń taralýyna toıtarys berip, indetti aýyzdyqtaımyz dep senemiz. Qazaq – san qıly tarıhynda budan da aýyr synaqtardan súrinbeı ótken jáne talaı tar jol, taıǵaq keshýden aman qalǵan halyq. Sonyń bárinde bekem birlik pen yrys-yntymaǵymyzǵa taban tiredik. Qazir de dál solaı aýyzbirshilik tanytsaq, aýrýdyń ári qaraı asqynýyna jol bermeıtinimiz sózsiz.

Sondyqtan árqaısymyz jaqyndarymyzǵa janashyrlyq tanytyp, mamandar anyqtap bergen talaptardy oryndaýǵa erekshe kóńil bóleıik! Ár azamatymyzdyń amandyǵy úshin birge kúreseıik!", - dedi ol.

Eske sala ketsek, búgin elimizde koronavırýs pandemııasynyń qurbany bolǵan azamattardy eske alýǵa baılanysty  Jalpyulttyq aza tutý kúni. Nur-Sultan ýaqytymen saǵat 12:00-de búkil el boıynsha bir mınýttyq únsizdik jarııalanady.

Aıta keteıik, buǵan deıin Elbasy Nursultan Nazarbaev indetten kóz jumǵandardyń týystary men jaqyndaryna kóńil aıtqan edi.

Sońǵy jańalyqtar