9 Shilde, 16:57 387 0 Jahan Anar LEPESOVA

Daǵdarys: United Airlines qyzmetkerleriniń jartysyn qysqartýǵa májbúr

Koronavırýs pandemııasy saldarynan daǵdarysqa tap bolǵan AQSh-tyń United Airlines kompanııasy óz qyzmetkerleriniń jartysyn qysqartýǵa májbúr.

Keshe kompanııa 36 myń qyzmetkerine qazannyń 1-inen bastap aqysyz demalysqa jiberiletinderin habarlady. Olardyń 2 myń 250-i ushqysh, 15 myńy bortserik, 16 myńnan astamy qyzmet kórsetý salasyndaǵy mamandar.

United Airlines kompanııasy memleketten mıllıardtaǵan dollar kómek alsa da, qarjy daǵdarysyn aınalyp óte almady. Naýryz aıynyń basynan bastap áýe tasymaly 95 paıyzǵa qysqardy. Úkimetten bólingen qarajat alpaýyt kompanııanyń qazan aıyna deıingi shyǵynyn ǵana óteıdi, dep habarlaıdy The Wall Street Journal.

Basylymnyń dereginshe, kompanııa kún saıyn 40 mln dollarǵa jýyq shyǵynǵa batýda. AQSh-ta jáne álemde epıdemıologııalyq ahýaldyń ońala qoımaǵanyn eskersek, United Airlines qarjy daǵdarysyn jaqyn ýaqytta eńsere qoıýy ekitalaı.

Eske sala keteıik, buǵan deıin qarjylyq qıynyqtarǵa baılanysty Germanııanyń ataqty Lufthansa áýe kompanııasy óziniń enshiles Germanwings kompanııasyn japqanyn habarlaǵanbyz.

Sońǵy 30 jylda Germanııanyń 30 jetekshi kompanııasy qatarynan kórinip kelgen Lufthansa jýyrda bul tizimnen shyǵyp qaldy. Tyǵyryqtan shyǵý úshin kompanııa qyzmetkerlerin qysqartý týraly sheshim qabyldady. Boljam boıynsha, «Lufthansa» -nyń 26 myń jumysshysy tabys kózinen aırylýy múmkin.

Sońǵy jańalyqtar