5 Shilde, 18:42 535 0 Jańalyqtar Asyl TUMAR

Qostanaılyq dombyrashylar Gınnes rekordtar kitabyna endi

Byltyr Qostanaı oblysynyń Amangeldi aýdanynda ótken Ulttyq dombyra kúnine arnalǵan merekede 1000 dombyrashy bir mezette eki kúı oryndaǵan edi.

Búgin amangeldilikterdiń Gınnes rekordtar kitabyna engeni halyqaralyq sertıfıkatpen rastaldy, – dep jazdy QazAqparat.

Byltyrǵy Qostanaı oblysyndaǵy Ulttyq dombyra kúniniń basty jańalyǵy – Amangeldi aýdanynda tuńǵysh ret 1000 dombyrashynyń qatysýymen kúı oınaldy. Bul bastamany aýdan ákimi Ámirhan Asanov kótergen. Dombyrashylar bir mezette Qurmanǵazynyń «Balbyraýyn» jáne «Kelinshek» kúılerin oryndady.

«Dombyrashylar aýdannyń ár aýylynan qatysty. Eń jasy 5 synyp oqýshysynan bastap, 90 jasqa taıaǵan qarııalarǵa deıin boldy. Byltyrǵy sharaǵa birneshe aı boıy daıyndyq jumystary júrgizildi. Ár aýyldardaǵy klýb qyzmetkerleri, mektepterdegi dombyra úıirmelerine jetekshilik etetin mýzyka pániniń muǵalimderi belsene qatysty. Maqsatqa qol jetkizdik, kúılerdi myń dombyrashy sátti oryndap shyqty. 1000 dombyrashyǵa óńirge belgili ónerpaz Oljas Qyldybaev dırıjerlik etti. Negizi 2019 jylǵy mamyr aıynda aýdanda ótken «Qyzǵaldaqtar festıvalinde» de 500 dombyrashy kúı tartqan. Sol kezde daıyndyǵymyz bir pysyqtalǵan edi», – deıdi aýdandyq mádenıet jáne tilderdi damytý bóliminiń basshysy Saǵynǵalı Seıdın.

Sonymen, aýdan ónerpazdarynyń jetistigi halyqaralyq sertıfıkatpen rastaldy.

Sertıfıkatta: «Eń kóp dombyrashynyń qatysýymen aýyldyq mekende oryndalǵan qazaqtyń dástúrli aspaptyq pesasy. Gınnes rekordyna 1000 oryndaýshy tirkeldi. Rekordty uıymdastyrýshy: Qostanaı oblysy, Amangeldi aýdanynyń ákimdigi», – dep jazylǵan.

Aýdandyq ishki saıasat bóliminiń basshysy Nurlybek Tájın aıtqandaı, is-shara beınetaspaǵa túsirilip, qujattaryn rettep halyqaralyq uıymnyń Sochıdegi keńsesine joldanǵan. Rekordty tekserýshiler qujattardyń durystyǵyn qarap, qatysýshylardy muqııat sanap shyqqan.

 

 

Sońǵy jańalyqtar