2 Shilde, 09:17 429 0 Jańalyqtar Anar LEPESOVA

Q.Toqev: Elbasy – BUU minberinen áriptesterin atomdy beıbit maqsatqa qoldanýǵa úndegen salıqaly saıasatker

Prezıdent Qasym-Jomart Toqaev "Egemen Qazaqstan" gazetinde jaryq kórgen "Tarıhı tulǵa taǵylymy" atty maqalasynda Elbasy Nursultan Nazarbaevtyń ıadrolyq qarýdy taratpaý týraly bastamasynyń jahandyq mańyzyna toqtaldy. 

"Sol jyldary KSRO sııaqty áskerı áleýeti zor memlekettiń ıadrolyq qarý-jaraǵyna ıe bolyp qalý Qazaqstanǵa qanshalyqty artyqshylyq bermek, álde jańa bir shıelenistiń oshaǵy tutana ma degen saýaldar kún tártibinde turǵan-dy. Óıtkeni elimizdiń qolyndaǵy ıadrolyq arsenal osy sanatta álemniń alǵashqy tórttigine qosylýǵa múmkindik beretin edi. Alaıda, Elbasynyń saıası erik-jigeri arqyly qazaq ulty álemde ıadrolyq synaqtan qatty zardap shekken halyq retinde joıqyn qarýdy taratpaý týraly bastama kóterdi", dedi ol.

Sondaı-aq, Memleket basshysy Tuńǵysh Prezıdenttiń toqtamyn halyqaralyq qaýymdastyq ta oń qabyldaǵanyn, búginge deıin Qazaqstannyń bastamasyn qýattaǵan birqatar memleketter ashyq kúndi tozaqqa aınaldyrǵan ıadrolyq polıgondaryn jaýyp, qoldaý kórsetip kele jatqanyn aıtty.

"Aıtalyq, Semeı polıgony jabylǵannan keıin Reseıdiń Jańa jerdegi synaq polıgony, AQSh aýmaǵyndaǵy "Nevada" polıgony, franýzdardyń Tynyq muhıttaǵy polıgony jáne Qytaıdyń Lobnor ıadrolyq synaq alańy jumysyn toqtatty. Jer sharynyń kez kelgen núktesine jeterlik bir myń eki júz ıadrolyq oqtumsyǵy bar 110-nan astam ballıstıkalyq zymyrandy quraıtyn mólsheri jaǵynan álemdegi tórtinshi ıadrolyq áleýet AQSh jáne Reseımen birlese otyryp, zalalsyzdandyryldy. 2006 jyldyń qyrkúıeginde aımaqtaǵy ózge de eldermen birge Ortalyq Azııany ıadrosyz aımaq dep jarııalaǵan Semeı kelisimine qol qoıyldy. Kelisimge qazirdiń ózinde 200-ge jýyq memleket qosylyp, 150-den astamy ratıfıkaııalady. Qazaqstannyń bul beıbitshil ıdeıasy negizinde Prezıdent Jarlyqqa qol qoıǵan 29 tamyz – Dúnıejúzilik ıadrolyq qarýǵa qarsy is-qımyl kúni retinde atalyp ótedi", degen Prezıdent osy beıbit bastamany áli de belsendi jalǵastyrýymyz qajet ekenin aıtty.

"Elbasy – BUU minberinen áriptesterin atomdy beıbit maqsatqa qoldanýǵa úndegen salıqaly saıasatker. Bul másele 1946 jyly alǵash shaqyrylǵan Bas Assambleıada qozǵalǵanymen álem elderi jantalasa qarýlanýyn toqtatpaǵan bolatyn. Sondyqtan tuńǵysh Prezıdenttiń tegeýrindi sózi men isi bir arnadan tabylyp, ol jahandaǵy joıqyn qarýdy taratpaý jolyndaǵy júıeli jumysty bastap berdi", dedi ol.

Sońǵy jańalyqtar