4 Maýsym, 13:37 46869 0 Saıasat Anar LEPESOVA

Darıǵa Nazarbaevanyń nemen aınalysyp júrgeni belgili boldy

Senattyń burynǵy spıkeri Darıǵa Nazarbaeva Qazaqstannyń jastar kongresiniń tóraǵasy qyzmetin atqaryp júr.

Bul aqparatty uıym qyzmetkeri rastady, dep habarlaıdy Sputnik Qazaqstan.

"Iá, Darıǵa Nursultanqyzy Qazaqstan jastar kongresin basqarýdy jalǵastyryp jatyr. Jaqynda kongress tóraǵasy jumysqa baılanysty jınalys ótkizdi. Ol jerde kongrestiń jumys jospary men ótken jyldaǵy qyzmetiniń qorytyndylary talqylandy", - dedi Sputnik Qazaqstan tilshisine Jastar kongresi atqarýshy dırektorynyń orynbasary Ásem Mádekeshova.

Qazaqstan jastary kongresi Tuńǵysh prezıdent Nursultan Nazarbaevtyń ıdeıasymen quryldy. Respýblıkalyq jáne halyqaralyq deńgeıde tabysty jumys isteıtin eldiń jastar birlestikteriniń eń iri uıym bolyp sanalady.

Darıǵa Nazarbaeva Qazaqstan jastar kongresin 2016 jyldan bastap basqarady.

Ol 2016 jyldyń 13 qyrkúıeginen bastap Parlamenttiń joǵary palatasynyń depýtaty boldy. 2019 jyldyń naýryzynan 2020 jyldyń mamyryna deıin Senat tóraǵasy qyzmetin atqardy.

2020 jyldyń ekinshi mamyrynda Qasym-Jomart Toqaevtyń jarlyǵymen senat spıkeri Darıǵa Nazarbaevanyń depýtattyq ókilettigi merziminen buryn toqtatyldy.

 

Sońǵy jańalyqtar