1 Maýsym, 12:21 979 0 Jańalyqtar Asyl TUMAR

Tastandy balalardyń 70 paıyzy – qazaq

Sýret ǵalamtordan alyndy
Sýret ǵalamtordan alyndy

1 maýsym – Halyqaralyq balalardy qorǵaý kúni. Bul merekeni álem elderi 70 jyldan astam atap ótip keledi.

QazAqparat tilshisi aıtýly mereke qarsańynda Nur-Sultan qalasyndaǵy mamandandyrylǵan balalar úıi dırektorynyń orynbasary Anargúl Smaǵulovamen tildesken bolatyn.

«Elordadaǵy mamandandyrylǵan balalar úıi 1933 jyly ashylǵan, 90 jylǵa jýyq tarıhy bar. Basynda bir qabatty etip aǵashtan turǵyzǵan. 1987 jyly mamandandyrylǵan balalar úıi dep ataýy ózgertildi. Sebebi bul jerge saý sábılerden bólek, densaýlyǵynda aqaýy bar nemese týa bitken kemistigi bar balalar da qabyldana bastady. Qazirgi ýaqytta ortalyqta 50-den astam sábı bar. Olardyń jas shamalary – 0-4 jas arasy. Jáne bizde 100-den astam qyzmetker eńbek etedi», – dedi Anargúl Smaǵulova.

Onyń aıtýynsha, balalar úıinde tek tul jetim sábıler ǵana emes, sonymen qatar ata-anasy bar balalar da tárbıelenýde.

«Keıbir ata-analar áleýmettik jaǵdaıynyń tómendiginen otbasyn asyraý múmkindigi bolmaǵandyqtan, balalaryn bizdiń ortalyqqa ákeledi. Olardyń ishinde otbasylyq jaǵdaıy túzelgen soń, balalaryn qaıta áketetin ata-analar bar, al keıbiri qaıtyp oralmaıdy. Ondaı jaǵdaıda biz ata-anasyn izdestiremiz, al odan nátıje shyqpaǵan jaǵdaıda quzyrly organdarǵa habarlaımyz. Bizdiń ortalyqta balalar 4 jasqa deıin bolady, odan keıin eresek balalar úıine, al erekshe kútimdi qajet etetin balalar arnaıy ortalyqtarǵa jiberiledi, bizdegi balalardyń 20 paıyzy múgedek nemese erekshe kútimdi qajet etedi», – deıdi ol.

Odan ári balalar úıi basshysynyń orynbasary sábı asyrap alýǵa qatysty áńgime órbitti.

«Sońǵy jyldary balalardy tek qazaqstandyq otbasylar asyrap alýda. Ókinishke qaraı, tastandy balalardyń kóbisi ózimizdiń qazaq ultynan. Atap aıtsaq, bizdegi balalardyń 70 paıyzy qazaqtyń qarakózderi. Jyl saıyn 30-dan astam balany otandastarymyz óz baýyryna basady, al byltyr 34 balany asyrap aldy. Bizdegi ár balanyń taǵdyry ártúrli: birin tastap ketse, ekinshisin ata-anasy asyraı almaǵandyqtan osynda ákelýge májbúr bolǵan. Osy oraıda bizdiń mamandar olarǵa ana ornyna ana, áke ornyna áke bolyp, jan-jylýlaryn aıamaıdy. Mamandandyrylǵan balalar úıinde barlyǵyna birdeı tıisti jaǵdaı jasalǵan, eshqaısysy nazardan tys qalmaıdy. Sonymen qatar, bala tárbıesi men kútimine qajetti mamandardyń barlyǵy bar», – dedi A. Smaǵulova.

Mamannyń málimdeýinshe, eldegi tótenshe jaǵdaıǵa baılanysty balalar úıinde jumys kestesi ózgerip, sanıtarlyq sharalar qatańdatylǵan.

«Karantınniń alǵashqy kúninen bastap, arnaıy bekitilgen qaýlynyń negizinde barlyq talartardy saqtaı otyryp jumys isteýdemiz. Balalaryn ýaqytsha ákelgen ata-analar bizge telefon shalyp nemese vıdeo baılanys arqyly balalarynyń jaǵdaıyn qadaǵalaýda. Búgin mereke bolǵandyqtan, sanıtarlyq erejelerdi saqtaı otyryp, balalarǵa arnalǵan merekelik shara uıymdastyrýdamyz. Onda balalar án aıtyp, bı bılep óz ónerlerin ortaǵa salady. Sońynda estelik sýretke túsip, táttiler taratylatyn bolady», – dedi ol.

Sońǵy jańalyqtar