26 Mamyr, 12:57 434 0 Jańalyqtar Asyl TUMAR

Bolat Baqaýovtiń isi boıynsha negizgi sot talqylaýy 27 mamyrǵa belgilendi

Sýret ǵalamtordan alyndy
Sýret ǵalamtordan alyndy

Pavlodar oblysynyń burynǵy ákimi Bolat Baqaýovtiń isi boıynsha negizgi sot talqylaýy 27 mamyrǵa belgilendi.

Pavlodar oblystyq sotynyń saıtynda jarııalanǵan Pavlodar qalalyq №2 sotynyń qaýlysynda: «Qylmystyq kodekstiń 361-baby 4-bóligi 3-tarmaǵynda kózdelgen qylmystyq quqyq buzýshylyqqa aıyptalyp otyrǵan Boqaýov Bolat Jumabekulyna qatysty qylmystyq is sot óndirisine alyndy. Negizgi sot talqylaýy sottalýshynyń, memlekettik aıyptaýshynyń jáne qorǵaýshy advokattyń qatysýymen 2020 jyldyń 27 mamyry kúni saǵat 10.00-ge Pavlodar qalalyq №2 sotynyń ǵımaratynda ashyq sot otyrysynda kelisimdi óndiriste belgilensin. Sottalýshyǵa qatysty tańdap alynǵan bultartpaý sharasy sol qalpynda qalsyn», – delingen.

Sonymen qatar atalǵan qujatta is boıynsha óndiristi qysqartýǵa nemese toqtata turýǵa alyp keletin eshqandaı negiz joq ekendigi atalyp ótilgen. Proessýaldyq kelisim jasaý barysynda taǵaıyndalǵan sot otyrysyna kedergi keltiretin qylmystyq is júrgizý zańyn buzýǵa jol berilmeıdi.

«Iske qatysty prokýrordyń aıyptaý aktisi bekitilgen joq, sottalýshyǵa qatysty taǵaıyndalǵan bultartpaý sharasyn ózgertýge jáne alyp tastaýǵa negiz joq. Qylmys saldarynan keltirilgen shyǵyndardyń ornyn toltyrýdy qamtamasyz etetin sharalar jáne múlikti tárkileý múmkindigi qabyldanǵan. Qarsylyq túsken joq. Sotqa deıingi óndiris barysynda kúdiktiń qorǵaýshysy retinde advokat qatysty. Onyń iske qatysýyna kedergi keltiretin jaıt joq», – delingen taratylǵan aqparatta.

Esterińizge sala ketsek, bıyl 16 qańtarda QR Ulttyq qaýipsizdik komıteti Pavlodar oblysynyń ákimi Bolat Baqaýovqa qatysty qylmystyq isti tergep jatqany belgili bolǵan edi.

«Ulttyq qaýipsizdik komıteti 2020 jylǵy 15 qańtarda Pavlodar oblysynyń ákimi Bolat Baqaýovqa qatysty laýazymdyq ýákilettigin asyra paıdalaný faktisi boıynsha QR QK-niń 362-baby 2-bóligi 3-tarmaǵy boıynsha tirkelgen qylmystyq iske sáıkes jedel-tergeý sharalaryn júrgizdi. Qazirgi ýaqytta tergeý amaldary jalǵasýda. Osy kezeńde tergeý múddesine oraı tolyq derekter jarııalanýǵa jatpaıdy», – delingen UQK aqparatynda.

Bolat Baqaýov 18 aqpannan beri úıqamaqta otyr. Sáýirde ony úıqamaqta ustaý merzimi mamyr aıyna deıin sozyldy.

Sońǵy jańalyqtar