22 Mamyr, 15:01 186 0 Jańalyqtar Anar LEPESOVA

«Parlament sózi»: Májilis bıyl da úzdik jýrnalısterdi marapattaıdy

Zań shyǵarý qyzmetin úzdik nasıhattaǵan jýrnalısterge arnalǵan «Parlament sózi» syılyǵyna úmitkerlerden ótinim qabyldaý bastaldy. 

Májilis baspasóz qyzmetiniń málimetinshe, elimizde oryn alǵan karantın rejımi Májilis depýtattarynyń jumys nysanyn ózgertkenimen, onyń mazmunyna áser etken joq. Osy turǵyda mańyzdy zań jobalaryn talqylaý, halyqty tolǵandyratyn máseleler boıynsha ázirlengen depýtattyq saýaldar burynǵydaı júıeli túrde jýrnalısterge usynylýda.

Sondyqtan bıyl da BAQ qyzmetkerleri kúni qarsańynda Májilis «Parlament sózi» syılyǵynyń jeńimpazdaryn anyqtaıtyn bolady.

Arnaıy parlamenttik syılyq 2016 jyly Palata Spıkeri Nurlan Nyǵmatýlınniń tóraǵalyq etýimen Májilis Bıýrosynyń sheshimi boıynsha taǵaıyndalǵan.

Ataýly syılyqqa palatanyń zań shyǵarýshylyq qyzmeti jaıynda 2019 jyldyń 3 qyrkúıegi men 2020 jyldyń 15 maýsymy aralyǵynda jazylǵan jáne jaryq kórgen materıaldar qabyldanady.

Jeńimpazdar Májilistiń qyzmeti týraly úzdik televızııalyq, merzimdik baspasóz, ǵalamtor men radıomaterıaldar, sonymen birge, foto jáne beınematerıaldar boıynsha anyqtalady. Sondaı-aq, Qazaqstan parlamenttik jýrnalıstıkasynyń damýy men órkendeýine úles qosqandar da eskeriledi.

Ótinimder 2020 jyldyń 22 maýsymyna deıin qabyldanady.

Qosymsha aqparatty Májilistiń www.parlam.kz resmı saıtynan alýǵa bolady.

 

Sońǵy jańalyqtar