25 Naýryz, 18:30 3011 0 Jańalyqtar Asyl TUMAR

TJ kezinde jumyssyz qalǵandarǵa járdemaqy qalaı tólenedi – mınıstr jaýaby

Sýret ǵalamtordan alyndy
Sýret ǵalamtordan alyndy

Tótenshe jaǵdaı kezeńinde tabysynan aıyrylǵan Qazaqstannyń jumys isteıtin azamattary Memlekettik áleýmettik saqtandyrý qorynan aqshalaı tólem alady. Bul týraly «Habar 24» telearnasynyń tikeleı efırinen QR Aqparat jáne qoǵamdyq damý mınıstri Dáýren Abaev aıtty.

«Keshe habarlaǵanymdaı, BAQ pen azamattardyń kelip túsip jatqan saýaldardyń basym bóligi tótenshe jaǵdaıdyń engizilýine baılanysty tabysynan aıyrylǵandarǵa aqshalaı tólem jasaýǵa qatysty bolyp otyr. Jalaqysyz eńbek demalysyna májbúrli túrde shyǵýyna baılanysty tótenshe jaǵdaı kezeńinde kirisinen aıyrylǵan Qazaqstannyń jumys isteıtin azamattary Memlekettik áleýmettik saqtandyrý qorynan tólem alady. 1 jumysshyǵa áleýmettik ólemniń kólemi aıyna 1 eń tómengi jalaqyny nemese 42,5 myń teńgeni quraıdy», – dedi mınıstr.

Onyń atap ótýinshe, Memlekettik áleýmettik saqtandyrý qorynan jańa tólem Qazaqstan aýmaǵynda jumys isteıtin el azamattaryna beriledi. Tólem alýdyń arnaıy sharttary da bar. Aldymen tótenshe jaǵdaıdyń jarııalanýyna baılanysty jalaqysy saqtalmaı demalysqa jiberilgen jumysshyǵa áleýmettik tólem beriledi.

Tólem alý úshin tótenshe jaǵdaı engizilgen dataǵa deıingi sońǵy 12 aıdyń keminde 3 aıynda azamattary Memlekettik áleýmettik saqtandyrý qoryna jumysshy úshin aýdarym jasalýy qajet.

Áleýmettik tólem orta, shaǵyn jáne mıkrobıznes jumysshylary úshin ǵana júzege asyrylady. Jańa áleýmettik tólemdi taǵaıyndaý úshin jumys berýshi jumyspen qamtý máseleleri jónindegi jergilikti organǵa júginip, tótenshe jaǵdaı kezinde qyzmetiniń shektelýine baılanysty jumysshysynyń kirisinen aıyrylatyndyǵyn dáleldeıtin qujat usynýy qajet.

Sońǵy jańalyqtar