М.Әуезов театрына жаңа директор тағайындалды

М.Әуезов театрына жаңа директор тағайындалды

М.Әуезов театрына жаңа директор тағайындалды
ашық дереккөзі
Мәдениет және спорт вице-министрі Нұрғиса Дәуешов Мұхтар Әуезов атындағы Қазақ мемлекеттік академиялық драма театры ұжымына жаңа директорды таныстырды. Бұл туралы театрдың баспасөз қызметі хабарлады. 
Бүгіннен бастап театрға өнертану ғылымдарының кандидаты, Қазақстанның еңбек сіңірген қайраткері  Еркін Тілеуқұлұлы Жуасбек басшылық етеді.
«Сәттілік тілейміз! Талай жыл қызмет етіп, осы жердің өсу-өркендеуіне атсалысып келе жатырсыз. Жалпы Қазақстанның театр өнері саласында еңбегіңіз орасан зор. Соны министрлік өте жақсы бағалап, өзіңізге деген үлкен жауапкершілік, сенім артып, театрдың дамуына үлес қосады деген ниетпен сізді тағайындауды жөн деп санады. Қызметіңіз құтты болсын. Бұл лауазымнан көрі, артылған жауапкершіліктің жүгі ауыр. Ұжыммен бірге жемісті қызмет етеріңізге сенеміз», – деп вице-министр жаңа басшыға министрліктің тарапынан бірнеше тапсырма берді. Ресми тағайындаудан кейін театрдың көркемдік жетекшісі, Қазақстанның Еңбек Ері Асанәлі Әшімов сөз алды. «Басшылыққа рахмет. Еркін – өзімізде өскен, қызметін адал атқарған азамат. Театрды біледі. Алдағы уақытта абыроймен жұмыс істейді деп үміттенеміз», - деді өнер майталманы. 
Театр қызметкерлері алдында сөз сөйлеген жаңа басшы: «Сіздермен қатарласа қызмет істеп, бар тәжірибем мен білімімді осы театрдың абыройын асқақтатуға саламын деген сөзіме сенулеріңізді сұраймын. Маған сенім білдірген Мәдениет және спорт министрі Ақтоты Райымқұловаға рахмет! Осыған дейін қалай жұмыс істесем, бұдан кейін де терең, мағыналы еңбек етуге тырысамын. Басқа айтарым жоқ», - деді.