Ақмола облысында Қытайдан келген отбасы ауруханаға жатқызылды

Қазақстанның бас санитарлық дәрігері Жандарбек Бекшин: «Бүгін сағат 11-дегі ақпаратымызға сәйкес, елімізде 4 науқас стационарға орналастырылды. Қазіргі таңда Алматы қаласындағы екі науқас медициналық көмек алғаннан кейін стаицонардан шығарылды. Сонымен қатар Атырау облысының Қызылқоға ауданында 1 науқас бар. Ол ЖРВИ диагнозымен ем алып жатыр. Нұр-Сұлтан қаласында таңертең Қытайдың Бейжің қаласынан келген 16 жастағы оқушы елордадағы Балалар инфекциясы ауруханасының стационарына жатқызылды. Оған инфекционист консультанттардың қорытындысы бойынша ЖРВИ диагнозы қойылды. Бала қазір ем алып жатыр», – деп атап өтті. Дәрігердің дерегінше, бүгін түстен кейін Алматы қаласында 1 адам дене қызуымен ауруханаға жатқызылған. Ал Ақмола облысында Хайнаньда демалыста болған бір отбасы мүшелері толықтай стационарда ем алып жатыр. Аталған отбасының 3 баласының екеуінде дене қызуы көтерілген. «Үшінші балада да ауру белгілері болды. Әке-шешесінде ондай белгілер жоқ. Бірақ, тығыз қарым-қатынаста болғаннан кейін онда да ауру белгілерінің анықталуы ықтимал», – деді ол. Бас санитарлық дәрігердің айтуынша, ауруханаларда медициналық маскалар жеткілікті. «Сонымен қатар әртүрлі медициналық маскаларды, бірреттік және кәсіби костюмдерді, вирусқа қарсы препараттарды, диагностикалық жабдықтар мен материалдарды шұғыл түрде сатып аламыз. Отандық өндірушілерге дәке таңғыштарды жаппай өндіруге тапсырыс берілді», – деді Бекшин.