Елбасы «Нұрлы жол» бағдарламасының жүзеге асырылуы туралы айтты

ҚР Президенті Нұрсұлтан Назарбаев «Нұрлы жол» бағдарламасының іске асырылуы туралы әңгімеледі, деп хабарлайды «ҚазАқпарат» ХАА тілшісі. Астана клубының отырысында РҒА Қиыр Шығыс институтының директоры Сергей Лузянин Қазақстан Президенті Нұрсұлтан Назарбаевқа «Нұрлы жол» бағдарламасы туралы сұрақ қойды. Нұрсұлтан Назарбаев Қазақстанның теңізге шығатын жолдары жоқ екенін атап өтті. 1991 жылы Кеңес одағы ыдырағаннан кейінгі кезеңде жолдардың барлығы Ресейге бағытталған еді. «Біз ең алдымен Қытайға қарай теміржол салып, өз саудамызды кеңейттік. Біз инфрақұырылымды қолға алуға тиіс едік», - деді ол. Оның сөзіне қарағанда, бағдарлама аясында 2 бесжылдықта 7,5 мың шақырым жол салынған. «Бірінші бесжылдықтың өзінде-ақ Қазақстандағы барлық әуежайды ретке келтірдік, Каспий теңізінің жағасына екі заманауи теңіз портын салдық. 2015 жылы ҚХР төрағасы Си Цзиньпин алғаш рет біздің университетімізде «Бір белдеу - бір жол» жоспарын жариялады. Жоспар мен біздің бағдарлама бір-бірімен керемет сәйкес келді. Әрине, біз осы жолды қолдадық», - деді Президент. Мемлекет басшысы Қазақстанға ҚХР-дан екі теміржол келетінін тілге тиек етті. Қытай шекарасынан Еуропаға Қазақстан арқылы өтетін 3 мың шақырым бірінші санатты автотрасса салынды. «Біз ұлан-ғайыр дала төсін қақ жарып өтетін теміржол магистралін салдық, Қытайдан Каспий теңізіне дейінгі 1 500 шақырымға созылған жол небәрі екі жылда салынды. Түркіменстан - Иран арқылы өтетін Парсы шығанағының Бәндәр-Аббас портына баратын, одан Үндістанға шыға алатын теміржолды салдық. Біз, міне, осындай шараларды қарастырдық. Тәуелсіздікті алған жылдары Қытаймен арадағы сауда нөлге тең болды. Қазір ол 15 млрд долларға жетті. Бұрын Қытайдан шыққан контейнерлер ешқашан Еуропаға жеткізілген емес, тек өткен жылдың өзінде контейнерлермен Қытайдың шығыс провинцияларынан Еуропаға 4 млн тонна жүк тасымалданды», - деді Назарбаев.