Астанада жас ақындарға мүшәйра жарияланды

Астана қаласының жас ақындарына мүшәйра жарияланды, деп хабарлайды ҚазАқпарат. Жыр байқауы - Қазақстан Республикасы мемлекеттік рәміздерінің 25 жылдығына арналады. «Мәңгілік ел - мұратым!» және  «Мемлекеттік рәміздер мақтанышым!»  тақырыптарына жазылған шығармалар 5-тамыз бен 5-қыркүйек аралығында қабылданады. Мүшәйраның жалпы жүлде қоры 1,2 млн теңге көлемінде. Мүшәйраның мақсаты мен міндеттері туралы ақын Қалқаман Сарин мен Астана қаласы әкімдігінің жастар саясаты мәселелері басқармасының басшысы Асхат Оралов баяндап берді. «Елбасы Н.Ә.Назарбаевтың «Болашаққа бағдар: рухани жаңғыру» бағдарламалық мақаласын жүзеге асыру шеңберінде жастар арасында ұлттық бірегейлік пен ұлттық құндылықтарымызды насихаттау мақсатында өтетін мүшайраға Астананың жас ақындарын қатысуға шақырамын. Биыл қалалық деңгейде өтетін мүшәйраны болашақта, республикалық, тіпті халықаралық жыр бәйгесіне айналдыруды жоспарлап отырмыз деді», - Асхат Оралов. Үш кезеңнен тұратын мүшәйраға 14 - 29 аралығындағы жас ақындар қатыса алады. Бірнші кезеңде : «Мәңгілік ел мұратым»  мен «Мемлекеттік рәміздер мәртебем» тақырыптарындағы шығармаларды қабылдау жүргізіледі. Екінші және үшінші кезеңде: өтінімдерді қарастыру мен үздік ақындар орнын анықтап, мүшәйраның әділ қазылар алқасының отырысы өткізіледі. Марапаттау рәсімі қыркүйек айында Астана қаласында салтанатты түрде өтеді. «Қабылданған материалдар рецензияланбайды және қайтарылмайды. Мүшәйра жұмыстары ереже шарттарына сәйкес келмесе, ұйымдастырушылар оларды қабылдамауға құқы бар. Бұл туралы өтінім ұсынылған күннен бастап төрт жұмыс күні ішінде Мүшәйраға қатысушыларына мәлімденуі тиіс»,- деді белгілі ақын Қалқаман Сарин.