Әнші Дәнеш Рақышевтың орындауындағы әндер

Дәнеш Рақышев, 1926 жылы туылған.  Әнші, композитор. Қазақ КСР халық артисі (1986). Ол әншілік өнер жолын көркемөнерпаздар үйірмесінен бастаған. 1944-45 жж. Шығыс Түркістандағы қазақтың жас әншілері құрамында ел аралап, өнер көрсеткен. 1945 ж. Құлжа қаласындағы (ҚХР) ұйғыр-қазақ театрының актері болып орналасып, Әбдірахман (Б.Майлин “Шұға”), Жапал, Қалқаман (М.Әуезов “Еңлік — Кебек” пен “Қалқаман — Мамыр”), т.б. сахналық бейнелерді сомдады. 1946-49 ж. осы театрдың қазақ бөлімін басқарған. 1959 ж. Қазақстанға оралғаннан кейін бұрынғы Талдықорған облысы Панфилов ауданындағы “Октябрьдің 40 жылдығы” халық театрының режиссері қызметін атқарды. 1968 жылдан Талдықорған филармониясының әнші-солисі және осындағы “Тамаша әзіл-сықақ кеші” тобының жетекшісі болды. М.Ержанов, Ж.Елебеков сияқты әншілердің орындаушылық дәстүрін жалғастырды. Оның орындауында: Үкілі Ыбырайдың “Аңшының әні”, Әсеттің “Ардақ”, “Мақпал”, “Атым Әсет”, “Хисмет”, “Аха-ау, жалған”, “Жайқоңыр” әндері, қазіргі қазақ композиторларының әндері бар. Ал, композиттер Дәнеш Рақышев: “Шаттық толқыны”, “Мақтанышты елім бар”, “Жас қайрат”, “Жер сұлуы Жетісу”, “Комсомол”, “Саясында алманың”, “Жеңеше”, “Туған жер”, “Алматым”, т.б. әндерін шығарған.