Бұдан былай ЖОО түлектеріне диплом электронды форматта беріледі

Биылдан бастап Қазақстандағы жоғары оқу орындары мен колледждер түлектерге дипломды электронды форматта береді. Бұл туралы ҚР Білім және ғылым вице-министрі Рүстем Биғари мәлімдеді.  «Биылдан бастап барлық жоғары оқу орны мен колледж түлектері дипломды қағаз түрімен ғана емес, электрондық түрде алады. Барлық нормативті акті қабылданды. Бұл не үшін қажет? Жұмыс беруші мен азаматтарда дипломның жасанды емес екеніне, сапасына қатысты сұрақтар туындап тұратыны жасырын емес. Дипломын растау үшін жұмыс беруші мен жас маманның көп уақыты кетеді. БҒМ-ға жыл сайын дипломның заңды екенін растау үшін 500 мыңға жуық өтінім келеді. Оны растау үшін көп уақыт қажет», - дейді ҚР Білім және ғылым вице-министрі. Рүстем Биғаридің дерегінше, бүгінде 1992 жылдан бергі 2,5 миллион диплом мәліметтер базасына енгізілген. 1992 жылға дейін бітіргендердің тарихи мәліметтері жинақталуда. «Биыл біз барлық дипломды цифрландырдық. Білім және ғылым министрлігі сайтынан базаға енгізілген дипломды онлайн режимде тексеруге болады. Жұмыс берушінің де, жұмысқа тұратын азаматтың да уақыты мен ақшасы үнемделеді. Енді дипломның заңды екенін растау үшін нотариусқа барып, ақша төлеудің қажеті жоқ. Жыл соңына дейін бұл жұмысты толық аяқтаймыз», - дейді министрдің орынбасары. Айта кетейік, бұған дейін еліміздің жоғары оқу орындары мен колледждеріне құжат электронды түрде қабылданатынын хабарлағанбыз.